Beskrywing / storie van die projek:
Bless my Bag is nou 3 jaar aktief en het in 2019 ‘n nasionale projek geword.
In kort help ons om weerlose vrouens se waardigheid te help herstel deur iets baie eenvoudig soos ‘n handsak. Die krag van ‘Iets van myne word joune en het ek aan jou gedink wanneer jy deur ‘n moeilike tyd gaan’ is soos ‘n goue draad deur hierdie projek geweef. Deur die oorhandiging van iemand se (“tweede kans”) tweedehandse handsak met die noodsaaklike items wat elke vrou moet hê) en ‘n bemoedigende boodskap, help ons om ‘n ander vrou se waardigheid te herstel en ‘n verskil in haar lewe te wees.
Indien nodig kan hulle dan na die tyd opgevang word, aangesien Bless my Bag by organisasies/kerke betrokke raak wat met weerlose vrouens werk. Ons voel sterk daaroor dat mens nie net liefdadigheid van ‘n afstand doen nie.
Tot dusver was dit saam met ons vrywilligers een opwindende reis van letterlik Woodstock in Kaapstad tot Johannesburg, verre noorde van Namibië tot in die suide van Libanon; waar vrouens nou weet dat hul waarde het en Jesus vir hul ook lief is.
Kontakbesonderhede:
Thamar Jacobs: thamar@blessmybag.org.za
Besoek ons webtuiste: www.blessmybag.org.za
Facebook: Bless my bag
Hoe om betrokke te raak:
- Skenk handsakke wat SKOON is en amper soos nuut lyk. Dit moet die doel dien om ‘n ander vrou se waardigheid te help herstel.
- Plaas items as jy kan vir binne die handsak: pakkie sanitêre doekies, lip ice, deodorant, handreiniger en ‘n pakkie sneesdoekies.
- Stel ons in kennis indien jy weet van ‘n organisasie wat by ‘n uitreik sal baat vind.
Pleegsorg Uitreik
Ons uitreik is ten bate van al die wonderlike vrouens in Ysterplaat wat in hierdie moeilike COVID ekonomiese tye ander kinders soos hul eie versorg deur as pleegsorg mammas op te tree.
Kom saam op Woensdag 27 Januarie 2021 na NG Kerk Ysterplaat waar ons hierdie besonderse vroue elkeen wil seën met ‘n handsak.
Navrae: thamar@ngkbloubergstrand.co.za
Storie van hoop:
Met een van ons uitreike in 2019 ontmoet ons ‘n dame op wie se gesig jy die lewe van swaarkry geskryf kon sien staan. Sy het by Bless my Bag ‘n splinternuwe handsak op Vrouedag in 2017 ontvang.
Met ons boodskap op dié Vrouedag het ons die vrouens daaraan herinner dat dit is hoe die Here hul sien. Splinternuut en die verlede word agtergelaat. Net die vorige aand het sy gebid dat Hy in haar behoefte sou voorsien, want haar enigste handsak is van ouderdom daarmee heen. Nou in 2019 dra sy nog steeds dieselfde handsak. Die boodskap van die nuwe handsak destyds het haar rigting in die lewe gevorm, en het sy weer van vooraf begin.
