Kindertyd 5 Jul 2020
Lukas 15: 1-7
Dink saam oor die volgende vrae:
1. Wat verkies jy: om ʼn partytjie te hou met baie lekkers en koek wat jy alles self kan opeet of ʼn partytjie met baie lekkers en koek, maar daar is ook baie maatjies en julle deel al die lekker eetgoed?
2. Het daar al een van jou gunsteling speelgoed weggeraak? Hoe hard het jy daarvoor gesoek? Het jy dit gekry? Hoe het jy gevoel toe jy dit gekry het?
Net soos ons baie maatjies by ons partytjie wil hê en soos wat ons soek na ʼn verlore speelding totdat ons dit kry, so wil God hê dat almal deel van Sy familie moet wees en soek hy dié wat nog nie deel is nie.
3. Hoe laat dit jou voel om te weet dat God jou sal aanhou soek totdat Hy jou kry en deel kan maak van Sy familie?
4. Hoe laat dit jou voel om te weet dat God ook baie ander mense aanhou soek. Selfs mense van wie ons nie altyd hou nie?
Doen nou die volgende aktiwiteit:
Druk die onthou-versie uit en kleur dit in en versier dit. Probeer om die versie te memoriseer terwyl jy dit doen.
Kindertyd 28 Jun 2020
Matt 5:43-48
Dink saam oor die volgende vrae:
1. Kyk saam die video wat Jesus se woorde oor vergifnis verduidelik.
2. Ek wonder hoe die mense gevoel het toe hulle Jesus se woorde gehoor het?
3. Ek wonder of dit vir jou maklik of moeilik is om iemand te vergewe wat lelik was met jou?
4. Vertel van ʼn keer wat iemand jou vergewe het.
5. Dink jy daar is iemand wat jy dalk moet vergewe op die oomblik?
Kindertyd 21 Jun 2020
Prediker 7:1-10 & 11:1-12
Dink saam oor die volgende vrae:
1. Ek wonder of jy kan vertel van ʼn keer wat dit gevoel het asof die wêreld onregverdig is.
2. Hoe sou jy die woord “onregverdig” aan iemand verduidelik?
3. Ek wonder of jy kan verwoord hoe dit jou laat voel as daar verkeerde of onregverdige dinge in die wêreld gebeur?
4. Dink saam aan ʼn paar goed wat jy reg kan doen al is die wêreld ʼn verkeerde plek?
5. Praat oor wat julle in veral Prediker 11 raakgelees het wat jou kan help om beter te wees as wat die wêreld van jou verwag
Kindertyd 14 Jun 2020
Dink saam oor die volgende vrae:
1. Ek wonder van watter deel van jou liggaam hou jy die meeste van?
2. Wat dink jy maak jou anders as anders mense (uniek)?
3. Dink jy God het jou meer of minder lief as ander mense?
4. Ek wonder of jy soms voel dat jy meer genade/vergifnis as ander mense nodig het?
5. Ek wonder hoe jy voel as jy hoor dat al is jy uniek geskape en jy ʼn unieke doel het, jou werk hier op aarde nie meer of minder belangrik as ander mense sʼn is nie.
Kindertyd 7 Jun 2020
Dink saam oor die volgende vrae:
- Ek wonder of jy kan onthou wanneer die eerste keer was wat jy self met ʼn mes gesny het?
- Het jy jouself al miskien per ongeluk raakgesny met ʼn mes?
- Ek wonder of jy soms voel asof jy sekere Bybelstories baie goed verstaan en ander glad nie?
- Gebeur dit soms dat jy iets glad nie verstaan het nie en dan later maak dit vir jou baie sin?
- Ek wonder of ons mekaar kan help om aan voorbeelde te dink waar sekere dele van ons geloof op sekere tye baie belangrik is en hoe ander dele van ons geloof weer op ander tye baie belangrik is (in die aktiwiteit is ook ʼn paar voorbeelde)?
Tiener Pinkster
Sondag 31 Mei 2020
Saterdag 30 Mei 2020
Vrydag 29 Mei 2020
Donderdag 28 Mei 2020
Woensdag 27 Mei 2020
Dinsdag 26 Mei 2020
Maandag 25 Mei 2020
Kinder Pinkster
Hand in Hand Pinksterreeks
Huisgeloof oordenkings vanuit die Psalms
Dit is in tye van krisis wat ons uitgedaag word om nuwe moontlikhede raak te sien en te ontgin. Hand in Hand is ‘n reeks vir huise om kinderpinkster tuis te vier en maak gebruik van Huisgeloof beginsels.
Die reeks bestaan uit 8 geleenthede (Hemelvaart, Sondag tot Vrydag en Pinksterfees) en hanteer met elke geleentheid ‘n Psalm en ‘n bypassende handgebaar. Ons eindig feestelik op Pinkstersondag met al die handgebare wat saam ‘n koek bak om die verjaarsdag van die kerk te vier. Wanneer ons so saam die koek bak herinner dit ons dat ons die kerk is en dat God ons hande wil gebruik om ‘n verskil in die wêreld te maak.
Mag dit vir elke huis tot seën wees om ook op hierdie anderste manier
Pinkster te vier. Waar ons die geboorte van die kerk vier en herdenk, mag ons hoop vind in ‘n God wat ons in sy Hand vashou!
Kindertyd 24 Mei 2020
Hebreërs 9:23-28
Dink saam oor die volgende vrae:
- Ek wonder of jy aan ʼn keer kan dink wat jy iets baie stouts gedoen het en jy moes jammer sê daarvoor?
- Vir wie moes jy jammer sê en hoe het daardie persoon reageer?
- Is dit maklik of moeilik om jammer te sê wanneer jy weet jy iets verkeerdgedoen het?
- Ek wonder hoe jy voel wanneer jy vir God moet jammer sê vir iets wat jy verkeerd gedoen het en God se hart seergemaak het?
- Ek wonder hoe God reageer wanneer ons vir God jammer sê vir al die dinge wat ons verkeerd doen?
Doen nou die volgende altiwiteit:
Benodighede: ʼn A4 bladsy en skêr.
Knip elkeen van die vier hoekies af (soos op die video). Knip nou weer die hoekies af. Kyk wie die meeste hoekies kan afknip voor die papier op is. (Dit kan dalk ʼn bietjie beplanning vra 😊)
Doen nou die volgende altiwiteit:
Inkleur deur middel van nommertjies is ʼn voorbeeld van iets waar ons klein stappies doen, om uiteindelik by die groot prentjie uit te kom. Ons kleur nie alles dadelik, gelyk in nie, maar stappie-vir-stappie kleur ons uiteindelik die hele prentjie klaar in.
Kindertyd 17 Mei 2020
Hebreërs 5:11-6:12
Dink saam oor die volgende vrae:
- Probeer terugdink aan die tyd toe jy leer fietsry het (of as jy nog nie kan fietsry nie aan iets wat jy leer doen het, soos self jou klere aantrek of self puzzle bou). Was dit die eerste keer maklik of moeilik? Hoe het jy gevoel toe jy dit nie dadelik reggekry het nie?
- Ek wonder wat jy gedoen het om dit reg te kry uiteindelik? Met fietsry, moet mens eers klein trappies gee, voor jy ver kan ry. Met puzzle bou, moet jy eers een stukkie en dan nog ʼn stukkie insit voor jy die hele puzzle kan klaar bou. Met aantrek, moet jy eers die broek, dan hemp, dan baadjie, sokkies, ens aantrek voor alles klaar aangetrek is.
- Ek wonder of mens dit kan regkry om van die begin af dadelik die perfekte kind van Jesus te wees en alles te doen presies soos Hy wil hê?
- Ek wonder watter kleiner “stappe” is daar waaraan ons kan werk, sodat ons nie moedeloos word nie, maar wat ons steeds help om by die groot prentjie of “langtermyn” doelwit van Chrsiten-wees uit te kom?
- Die Hebreërs skrywer se voorstel van hierdie “klein stappe” is liefde, diens en geduld. Ek wonder of ons saam aan voorbeelde hiervan kan dink?
Kindertyd 10 Mei 2020
Hebreërs 4
Dink saam oor die volgende vrae:
1. Ek wonder of jy al so lank gewag het voor jy ʼn sjokolade of iets anders geëet het, dat jy later aan niks anders as daardie sjokolade kon dink nie?
2. Ek wonder of jou ma of pa al vir jou gevra het om iets te doen, maar dan doen jy dit nie dadelik nie en dan pla so stemmetjie in jou kop jou heeltyd daaroor?
3. Hoe voel dit wanneer iemand jou gevra het om iets te doen en jy kon dit dadelik op jou eie regkry?
4. Ek wonder of daar dinge is wat Jesus van ons vra wat ons nog nie reggekry het nie, wat ons so bietjie pla omdat ons dit nie doen nie?
5. Dink aan verlede week se “huisreëls”. Watter van die reëls het jy reggekry om te doen en watter sukkel jy nog mee? Hoe laat dit jou voel dat jy nog so bietjie daarmee sukkel?
Doen nou die volgende altiwiteit:
Help die seuntjie en dogtertjie om hul “werkie” klaar te maak en die sjokolade op te eet sodat hulle bietjie rus kan kry.
(Daar is verskillende moeilikheidsgrade vir verskillende ouderdomme)
Ons laai elke week ʼn video en ʼn aktiwiteit op.
Vandag se aktiwiteit
1. Gesels saam oor julle huis se huisreëls.
2. Indien julle nog nie het nie, stel saam huisrëels op of
gesels oor die voorbeeld hieronder.
3. Skryf en versier julle eie huisreëls of versier die reëls
hieronder.
4. Praat weer oor hoekom die reëls belangrik is.
5. Praat veral oor wat onvoorwaardelike liefde beteken al
kom iemand nie die reëls na nie.
6. Gesels oor hoekom daar sekere riglyne in die Bybel is
oor hoe ons moet leef al het Jesus klaar aan die kruis
gesterf en hoef ons niks meer te doen om gered te
word nie.
Saam met ons weeklikse preke gaan ons ook van hierdie week af vir julle ʼn kindertyd beskikbaar maak wat by die tema van die preek pas. Elke week sal daar ʼn video en ʼn aktiwiteit beskikbaar wees.
Ons voorstel is, om soos met “gewone eredienste” die volgorde soos volg te doen:
- Kyk watter aktiwiteite vir die kindertyd voorgestel word en kry dit gereed (miskien moet iets uitgedruk word of die potlode nader getrek word.)
- Indien daar aanbiddingsvoorstelle op die ‘huiskerk’ bladsy is, sing 1 of 2 liedjies saam
- Kyk saam die kindertyd video en gesels daaroor.
- Gee vir die jonges hulle aktiwiteite om te doen
- Kyk die preek terwyl die kinders hulle aktiwiteite in julle teenwoordigheid doen.
Kategese Tye:
Junior Jeug (3jr – Gr. 6) 08:30 – 09:30:
Tydens die 08:30 erediens, waar die kinders die eerste deel van die diens bywoon en dan na hul verskeie klassies gaan.
Senior Jeug & Belydenisklas (Gr. 7 – Gr.11) 17:30 – 18:00:
Hulle woon dan die 18:00 erediens by saam met hul ouers of klasmaats.
Ons filosofie
Beide ons Junior en Senior jeugbedienings is gebaseer op die beginsel van verhoudings. Ons glo dat jongmense deur goeie positiewe verhoudings verander en beïnvloed word. En daarom doen ons spesiale moeite om seker te maak dat hul op verskeie vlakke aan positiewe verhoudings blootgestel word. Ons doen dit op die volgende maniere:
Kategese
Aangesien ons werk om langtermyn verhoudings te vestig is dit vir ons belangrik dat dieselfde kategeet van Gr. 1 – 6 dieselfde klassie het en dan weer dieselfde kategeet van Gr 7 – 11. Ons spandeer ook ekstra moeite om seker te maak dat die materiaal relevant en goed uitgewerk is. Dit beteken dat ons soms self lessies uitwerk en soms vanuit ’n boekie werk, afhangende van die seisoen. Op dieselfde beginsel probeer ons ook om die kategese klasse te laat aansluit by eredienste. Vir groot dele van die jaar stem die tema van die 8:30 diens en junior kategete en die tema van die 18:00 diens en senior kategete met mekaar ooreen.
Kampe
’n Tweede vlak van verhouding gebeur op ons kampe. Ons het elke jaar ’n junior en senior kamp. Op hierdie kampe handhaaf ons ’n goeie balans tussen goeie pret en ernstig bymekaar leer. Die kategete gaan ook saam op hierdie kamp om die verhoudings verder te versterk. ’n Derde kamp wat ons hou is die Belydeniskamp. Hierdie verpligte kamp is gefokus op dissipelskap en wat dit beteken om ’n dissipel in jou gemeenskap en kerk te wees.
Koffiekroeg aande
Een keer per kwartaal hou ons ’n lekker saam-kuier geleentheid vir die junior en senior jeug onderskeidelik. Hierdie aande is werklik net gefokus op lekker saamkuier en mekaar beter leer ken. Hierdie geleenthede sal vroegtydig in die Sondag afkondigings wees om seker te maak dat niemand op die geleentheid uit mis nie.
Pretweek (Junior Jeug)
In die Junie, Oktober en Desember skoolvakansie het ons drie-dag Pretweke. Die fokus hiervan is om, gekoppel aan ’n tema, saam te leer te speel, te sing en sommer ook lekker te eet. Die Junie en Desember vakansies is vir al die junior jeug en die Oktober vakansie se fokus is spesifiek op Gr. 4-6. Wees ook op die uitkyk vir advertensies hieroor.
Namibië uitreik (Senior Jeug)
Tydens die Junie skoolvakansie gaan ons saam met NG Kerk Tableview en NG Grootekerk op ’n twee weke uitreik na die Kaokoland in die noorde van Namibië. Die blootstelling wat die jongmense hier kry is van onskatbare waarde. Dit is ook ’n uitstekende plek om positiewe verhoudings te bou en geleentheid vir introspeksie. Die kulturele blootstelling help ook om ons eie lewe in perspektief te plaas. Natuurlik kry ons ook ’n geleentheid om die goeie nuus van Jesus met mense te deel.