Kategese Inskrywings
Kategese Tye:
Junior Jeug (3jr – Gr. 6) 08:30 – 09:30:
Tydens die 08:30 erediens, waar die kinders die eerste deel van die diens bywoon en dan na hul verskeie klassies gaan.
Kategese
Aangesien ons werk om langtermyn verhoudings te vestig is dit vir ons belangrik dat dieselfde kategeet van Gr. 1 – 6 dieselfde klassie het. Ons spandeer ook ekstra moeite om seker te maak dat die materiaal relevant en goed uitgewerk is. Dit beteken dat ons soms self lessies uitwerk en soms vanuit ’n boekie werk, afhangende van die seisoen. Op dieselfde beginsel probeer ons ook om die kategese klasse te laat aansluit by eredienste. Vir groot dele van die jaar stem die tema van die 8:30 diens en junior kategete met mekaar ooreen.
Ons filosofie
Ons Junior jeugbediening (voorskool – Gr. 6) is gebaseer op die beginsel van verhoudings. Ons glo dat kinders deur goeie positiewe verhoudings verander en beïnvloed word. En daarom doen ons spesiale moeite om seker te maak dat hul op verskeie vlakke aan positiewe verhoudings blootgestel word. Ons doen dit op die volgende maniere:
Kampe
’n Tweede vlak van verhouding gebeur op ons kampe. Ons het elke jaar ’n junior en senior kamp. Op hierdie kampe handhaaf ons ’n goeie balans tussen goeie pret en ernstig bymekaar leer. Die kategete gaan ook saam op hierdie kamp om die verhoudings verder te versterk. ’n Derde kamp wat ons hou is die Belydeniskamp. Hierdie verpligte kamp is gefokus op dissipelskap en wat dit beteken om ’n dissipel in jou gemeenskap en kerk te wees.
Kindertyd 11 April 2021
Kindertyd 28 Mrt 2021
Kindertyd 7 Mrt 2021
Kindertyd 28 Feb 2021
Kindertyd 21 Feb 2021
Kindertyd 14 Feb 2021
Kindertyd 7 Feb 2021
Kindertyd 31Jan 2021
Kindertyd 24 Jan 2021
Kindertyd 17 Jan 2021
Kindertyd 10 Jan 2021
Kindertyd 20 Desember 2020
Kindertyd 13 Desember 2020
Kindertyd 6 Desember 2020
Kindertyd 29 November 2020
Kindertyd 22 November 2020
Kindertyd 15 November 2020
Dink saam oor die volgende vrae:
- Wat was/is vir jou moeilik om te leer doen? Miskien fietsry, swem of somme maak? Gesels met jou ouers of die grootmense in jou lewe oor wat vir hulle moeilik was/is om te leer.
- Vertel van ‘n keer wat jy ‘n fout gemaak het en wat jy daaruit geleer het.
- Wat is die belangrikste ding waarvan ons elke dag meer moet hê? (Antwoord:Liefde.)
Kindertyd 8 November 2020
Kindertyd 1 November 2020
Dink saam oor die volgende vrae:
- Dink aan die laaste keer wat iemand aan jou ʼn belofte gemaak het. Wat was dit?
- Watter beloftes dink jy maak God aan jou?
- Sê nou maar God belowe dat Hy jou altyd sal liefhê, dink jy jy moet iets doen sodat God Sy eie belofte sal nakom?
- Hoe laat dit jou voel om te weet dat God belowe dat Hy jou altyd sal liefhê?
Kindertyd 25 Oktober 2020
Dink saam oor die volgende vrae:
1. Verduidelik vir iemand wat liefde is of hoe lyk liefde?
2. Dink aan ‘n keer wat jy kans gehad het om iemand lief te hê.
3. Hoe kan ons vir iemand met ons dade wys dat Jesus lief is vir hulle?
Kindertyd 18 Oktober 2020
Dink saam oor die volgende vrae:
- Wat is die netjieste klere wat jy in jou kas het?
- Hoe voel jy as jy jou baie netjiese klere aan het?
- Die Bybel sê dat toe ons gedoop is, is ons met Jesus aangetrek. Hoe dink jy lyk iemand wat met Jesus aangetrek is?
- Op watter maniere dink jy kan ons leef dat mense nie meer vir ons raaksien nie, maar eerder vir Jesus wat ons soos ʼn groot jas toemaak?
Kindertyd 11 Oktober 2020
Kindertyd 4 Oktober 2020
Dink saam oor die volgende vrae:
- Wie is die oudste persoon wat julle ken?
- Hoe weet mens iemand is oud?
- Wat is die verskil tussen iemand wat oud en iemand wat jonk is?
- Dink julle daar is ʼn verskil in die manier hoe God oor jongmense en oumense voel?
- Hierdie week is week vir senior persone in die land, besluit as gesin saam op een ding wat julle vir ʼn ouer persoon gaan doen.
Kindertyd 27 September 2020
Dink saam oor die volgende vrae:
- Wat is jou gunsteling kos?
- Wie is die mense wat julle die graagste oornooi om by julle te kom eet?
- Wanneer laas het julle iemand genooi wat julle glad nie ken nie?
- Vertel vir mekaar wat gasvryheid beteken.
- Jesus nooi mense om saam met Hom te eet al ken hulle hom nie en weet hulle nie wat Hy op aarde kom doen het nie. Wat leer dit jou van gasvryheid?
Kindertyd 20 September 2020
Dink saam oor die volgende vrae:
- Vertel van ʼn keer wat jy ʼn geskenk gekry het wat jy glad nie wou gehad het nie?
- Was jy al siek en het gewens jy bly siek?
- Was jy al so kwaad vir jou boetie, sussie of maatjie dat jy gedink het jy gaan vir altyd kwaad bly vir hulle?
Soms wanneer ons kies om kwaad te bly, is dit asof ons wens ons bly verkoue. Jesus kom gee vir ons ʼn geskenk van genade waarin ons nie heeltyd kwaad hoef te wees nie. Hy vra wel van ons om te dink oor hoekom ons nog kwaad of hartseer is as dit nie meer nodig is nie.
Kindertyd 13 September 2020
Dink saam oor die volgende vrae:
- Vertel vir mekaar van ʼn keer wat jy siek was en hoe dit gevoel het om uiteindelik weer gesond te word.
- Vertel vir mekaar ʼn storie uit die Bybel wat julle ken waar Jesus iemand gesond gemaak het.
- Kyk weer na vandag se storie: Wat gebeur eerste: Raak die seun eers gesond of begin die man eers glo? (Ons dink altyd ons moet eers glo, maar hier raak die man gesond, selfs nog voordat Hy glo)
- Vertel vir mekaar wat die lekkerste geskenk is wat jy al gekry het. Wie het vir jou daardie geskenk gegee?
Wanneer Jesus mense gesond maak, is dit soos ʼn baie groot geskenk wat hulle kry, maar hulle sou nooit die geskenk gekry het as dit nie vir die Een was wat die geskenk gegee het nie. Jesus maak dus mense gesond sodat hulle gesond kan wees, maar veral ook sodat hulle Hom kan leer ken.
Aktiwiteit
Hou as huishouding saam nagmaal vandag.
Kindertyd 6 September 2020
Dink saam oor die volgende vrae:
- Hoe het dit gevoel om as gesin saam nagmaal te gebruik?
- Waaroor het julle gepraat terwyl julle saam nagmaal gebruik het?
- In die storie waar Jesus met die Samaritaanse vrou praat, nooi Hy haar om deel van Sy familie te wees nog voordat sy self vir Hom kan vertel van al die dinge wat sy al verkeerd gedoen het. Hy vergewe haar met ander woorde nog selfs voor sy jammer sê. Hoe laat dit jou voel om te weet dat Jesus ook vir jou vergewe selfs nog voor jy hoef jammer te sê?
- Dit beteken dat wanneer ons vir Jesus jammer sê, is Hy al lankal nie meer kwaad nie, want jy is klaar vergewe. Hoekom dink jy is dit steeds nodig om jammer te sê, al het Jesus jou klaar vergewe?
Kindertyd 30 Aug 2020
Galasiërs 5:13-22
Dink saam oor die volgende vrae:
- Wat dink jy beteken dit om vry te wees?
- Noem bietjie voorbeelde van mense wat nie vry is nie.
- Dink jy die reëls wat julle by die huis het, help jou om vry te wees, of keer jou om vry te wees?
- Hoekom dink jy is daar reëls in julle huis? Hoe help die reëls jou?
- Hoekom dink jy is dit belangrik dat ʼn groep mense dieselfde reëls volg en elkeen nie net sy eie stel reëls volg nie?
Kindertyd 23 Aug 2020
2 Petrus 1:1-11
1. Wie in die hele wêreld vertrou jy die heel meeste?
2. Sal jy daardie persoon vertrou om jou te help om die regte besluite te maak?
3. Is dit vir jou maklik of moeilik om die regte besluite te maak, soos om te luister as jou ouers iets van jou vra of om te kies om vriendelik eerder as kwaai te wees met mense?
4. Hoe dink jy kan God ons help om die regte dinge te doen?
5. Hoe dink jy help dit ons as ons God heeltemal vertrou, om ons te help om die regte dinge te doen?
6. Hoe kan God ons help om self-beheersing te hê wanneer ons probeer om die regte dinge te doen?
Kindertyd 16 Aug 2020
Matteus 11
Dink saam oor die volgende vrae:
1. Waar is die plek waar jy die veiligste voel?
2. Watter tipe mense laat jou veilig voel?
3. Na wie toe kan jy gaan as jy ʼn fout gemaak het of miskien vir iemand moet sê as jy iets verkeerd gedoen het?
4. Wat help jou om veilig te voel?
5. Hoe laat dit jou voel om te weet dat God die een is by wie ons die veiligste kan voel?
Kindertyd 2 Aug 2020
Tessalonisense 1:1-5;11-12
Dink saam oor die volgende vrae:
1. Het jy al in ʼn stroom beland (in die see of in ʼn rivier) en kon uitkom nie?
2. Hoe voel dit (of dink jy voel dit) om so meegesleur te word?
3. Verbeel jou die stroom kan ʼn goeie invloed hê, soos wanneer die surfers doelbewus in die stroom spring, om vinniger agter die branders te kom: Ek wonder of jy aan voorbeelde in die lewe kan dink waar ʼn goeie stroom mens help om goeie dinge te doen? Ons sou dit ook positiewe groepsdruk kon noem?
4. Dink jy dit is makliker om ʼn goeie ding alleen of saam met ander mense te doen?
5. Watter mense of groepe mense sien jy rondom jou wat jou soos ʼn stroom kan help om saam met hulle goeie dinge te doen?
Kindertyd 26 Jul 2020
Titus 3:3-9
Dink saam oor die volgende vrae:
1. Wie is die mense met wie jy die vriendelikste is?
2. Wanneer is dit vir jou maklik om vriendelik met iemand te wees?
3. Wanneer is dit vir jou moeilik om vriendelik met iemand te wees?
4. Ek wonder of jy aan ʼn geleentheid kan dink wat van jou gaan vra om vriendelik te wees al wil jy nie wees nie?
5. Ek wonder of jy kan dink aan ʼn keer wat dit vir jou baie moeilik was om vriendelik te wees.
Kindertyd 19 Jul 2020
Dink saam oor die volgende vrae:
1. Ken julle die speletjie JENGA? Wat gebeur as mens te veel blokkies begin uittrek uit die toring?
2. Wat dink jy sal gebeur as jy te veel bakstene uit ʼn baksteen muur begin haal?
3. Wanneer laas was jy siek gewees? Hoe het jou lyf gevoel? Hoe het jou emosies gevoel? Was dit maklik of moeilik om vriendelik met die mense rondom jou te wees?
4. Ek wonder of jy kan dink hoe jy help om shalom in jou huis of gemeenskap moontlik te maak?
5. Ek wonder hoe Jesus ons kom help om hierdie vrede ʼn realiteit te maak?
In die Ou Testament is daar ʼn woord wat dikwels gebruik word: SHALOM. Die woord beteken VREDE. Dit verwys egter nie net na wanneer daar nie ʼn bakleiery is nie. Dit verwys ook daarna as al die dele van ʼn muur mooi inmekaar pas. Of as al die mense in ʼn groep mooi saamwerk of as al die dele van jou menswees (liggaam, emosies, verhoudings, gees, siel) mooi saamwerk. Dit is ook die woord wat baie mense vandag nog gebruik om mekaar te groet. Dis hulle manier van “hallo” sê. Maar hulle sê nie net hallo nie. Hulle sê ook: Ek hoop jy is in vrede met die mense rondom jou en in vrede met jouself en in vrede met God.
* Die Bybel leer ons dat ons vir God op dieselfde manier kan aanhou vra vir goed totdat Hy dit vir ons gee. Dit maak egter duidelik dat alhoewel ons vir God vir enige iets mag vra, Hy ook graag wil hê dat ons saam met Hom moet dink oor al die dinge wat verkeerd of onregverdig in die wêreld is. Wanneer ons oor daardie dinge begin bid, moet ons egter geduldig bid. Dit beteken dat ons moet aanhou en nie ophou nie totdat dit gebeur waarvoor ons bid. Ons moenie sommer net moed opgee nie.
Kindertyd 12 Jul 2020
Lukas 18:1-8
Dink saam oor die volgende vrae:
1. Het dit al met jou gebeur dat jy vir baie lank vir ʼn spesifieke speelding gevra het vir jou ouers en aanhou vra het, tot hulle uiteindelik ingegee het en dit vir jou gegee het?
2. Het dit iewers in daai tyd wat jy so moes vra en aanhou vra, vir jou gevoel asof dit nie meer die moeite werd is nie en jy gaan moed opgee want dit lyk nie asof jy dit ooit gaan kry nie? *
3. Watter dinge in die wêreld sien jy raak wat jou hartseer maak of wat onregverdig is?
4. Ek wonder of ons nie saam kan besluit om van vandag af oor daardie dinge te bid nie?
5. Die storie in Lukas sê dat ons moet aanhou bid vir al die verkeerde dinge wat ons sien al beteken dit ons moet daarvoor bid totdat ons eendag doodgaan. Sien jy kans om so geduldig aan te hou bid?
Kindertyd 5 Jul 2020
Lukas 15: 1-7
Dink saam oor die volgende vrae:
1. Wat verkies jy: om ʼn partytjie te hou met baie lekkers en koek wat jy alles self kan opeet of ʼn partytjie met baie lekkers en koek, maar daar is ook baie maatjies en julle deel al die lekker eetgoed?
2. Het daar al een van jou gunsteling speelgoed weggeraak? Hoe hard het jy daarvoor gesoek? Het jy dit gekry? Hoe het jy gevoel toe jy dit gekry het?
Net soos ons baie maatjies by ons partytjie wil hê en soos wat ons soek na ʼn verlore speelding totdat ons dit kry, so wil God hê dat almal deel van Sy familie moet wees en soek hy dié wat nog nie deel is nie.
3. Hoe laat dit jou voel om te weet dat God jou sal aanhou soek totdat Hy jou kry en deel kan maak van Sy familie?
4. Hoe laat dit jou voel om te weet dat God ook baie ander mense aanhou soek. Selfs mense van wie ons nie altyd hou nie?
Doen nou die volgende aktiwiteit:
Druk die onthou-versie uit en kleur dit in en versier dit. Probeer om die versie te memoriseer terwyl jy dit doen.
Kindertyd 28 Jun 2020
Matt 5:43-48
Dink saam oor die volgende vrae:
1. Kyk saam die video wat Jesus se woorde oor vergifnis verduidelik.
2. Ek wonder hoe die mense gevoel het toe hulle Jesus se woorde gehoor het?
3. Ek wonder of dit vir jou maklik of moeilik is om iemand te vergewe wat lelik was met jou?
4. Vertel van ʼn keer wat iemand jou vergewe het.
5. Dink jy daar is iemand wat jy dalk moet vergewe op die oomblik?
Kindertyd 21 Jun 2020
Prediker 7:1-10 & 11:1-12
Dink saam oor die volgende vrae:
1. Ek wonder of jy kan vertel van ʼn keer wat dit gevoel het asof die wêreld onregverdig is.
2. Hoe sou jy die woord “onregverdig” aan iemand verduidelik?
3. Ek wonder of jy kan verwoord hoe dit jou laat voel as daar verkeerde of onregverdige dinge in die wêreld gebeur?
4. Dink saam aan ʼn paar goed wat jy reg kan doen al is die wêreld ʼn verkeerde plek?
5. Praat oor wat julle in veral Prediker 11 raakgelees het wat jou kan help om beter te wees as wat die wêreld van jou verwag
Kindertyd 14 Jun 2020
Dink saam oor die volgende vrae:
1. Ek wonder van watter deel van jou liggaam hou jy die meeste van?
2. Wat dink jy maak jou anders as anders mense (uniek)?
3. Dink jy God het jou meer of minder lief as ander mense?
4. Ek wonder of jy soms voel dat jy meer genade/vergifnis as ander mense nodig het?
5. Ek wonder hoe jy voel as jy hoor dat al is jy uniek geskape en jy ʼn unieke doel het, jou werk hier op aarde nie meer of minder belangrik as ander mense sʼn is nie.
Kindertyd 7 Jun 2020
Dink saam oor die volgende vrae:
- Ek wonder of jy kan onthou wanneer die eerste keer was wat jy self met ʼn mes gesny het?
- Het jy jouself al miskien per ongeluk raakgesny met ʼn mes?
- Ek wonder of jy soms voel asof jy sekere Bybelstories baie goed verstaan en ander glad nie?
- Gebeur dit soms dat jy iets glad nie verstaan het nie en dan later maak dit vir jou baie sin?
- Ek wonder of ons mekaar kan help om aan voorbeelde te dink waar sekere dele van ons geloof op sekere tye baie belangrik is en hoe ander dele van ons geloof weer op ander tye baie belangrik is (in die aktiwiteit is ook ʼn paar voorbeelde)?
Kinder Pinkster
Hand in Hand Pinksterreeks
Huisgeloof oordenkings vanuit die Psalms
Dit is in tye van krisis wat ons uitgedaag word om nuwe moontlikhede raak te sien en te ontgin. Hand in Hand is ‘n reeks vir huise om kinderpinkster tuis te vier en maak gebruik van Huisgeloof beginsels.
Die reeks bestaan uit 8 geleenthede (Hemelvaart, Sondag tot Vrydag en Pinksterfees) en hanteer met elke geleentheid ‘n Psalm en ‘n bypassende handgebaar. Ons eindig feestelik op Pinkstersondag met al die handgebare wat saam ‘n koek bak om die verjaarsdag van die kerk te vier. Wanneer ons so saam die koek bak herinner dit ons dat ons die kerk is en dat God ons hande wil gebruik om ‘n verskil in die wêreld te maak.
Mag dit vir elke huis tot seën wees om ook op hierdie anderste manier
Pinkster te vier. Waar ons die geboorte van die kerk vier en herdenk, mag ons hoop vind in ‘n God wat ons in sy Hand vashou!
Kindertyd 24 Mei 2020
Hebreërs 9:23-28
Dink saam oor die volgende vrae:
- Ek wonder of jy aan ʼn keer kan dink wat jy iets baie stouts gedoen het en jy moes jammer sê daarvoor?
- Vir wie moes jy jammer sê en hoe het daardie persoon reageer?
- Is dit maklik of moeilik om jammer te sê wanneer jy weet jy iets verkeerdgedoen het?
- Ek wonder hoe jy voel wanneer jy vir God moet jammer sê vir iets wat jy verkeerd gedoen het en God se hart seergemaak het?
- Ek wonder hoe God reageer wanneer ons vir God jammer sê vir al die dinge wat ons verkeerd doen?
Doen nou die volgende altiwiteit:
Benodighede: ʼn A4 bladsy en skêr.
Knip elkeen van die vier hoekies af (soos op die video). Knip nou weer die hoekies af. Kyk wie die meeste hoekies kan afknip voor die papier op is. (Dit kan dalk ʼn bietjie beplanning vra 😊)
Doen nou die volgende altiwiteit:
Inkleur deur middel van nommertjies is ʼn voorbeeld van iets waar ons klein stappies doen, om uiteindelik by die groot prentjie uit te kom. Ons kleur nie alles dadelik, gelyk in nie, maar stappie-vir-stappie kleur ons uiteindelik die hele prentjie klaar in.
Kindertyd 17 Mei 2020
Hebreërs 5:11-6:12
Dink saam oor die volgende vrae:
- Probeer terugdink aan die tyd toe jy leer fietsry het (of as jy nog nie kan fietsry nie aan iets wat jy leer doen het, soos self jou klere aantrek of self puzzle bou). Was dit die eerste keer maklik of moeilik? Hoe het jy gevoel toe jy dit nie dadelik reggekry het nie?
- Ek wonder wat jy gedoen het om dit reg te kry uiteindelik? Met fietsry, moet mens eers klein trappies gee, voor jy ver kan ry. Met puzzle bou, moet jy eers een stukkie en dan nog ʼn stukkie insit voor jy die hele puzzle kan klaar bou. Met aantrek, moet jy eers die broek, dan hemp, dan baadjie, sokkies, ens aantrek voor alles klaar aangetrek is.
- Ek wonder of mens dit kan regkry om van die begin af dadelik die perfekte kind van Jesus te wees en alles te doen presies soos Hy wil hê?
- Ek wonder watter kleiner “stappe” is daar waaraan ons kan werk, sodat ons nie moedeloos word nie, maar wat ons steeds help om by die groot prentjie of “langtermyn” doelwit van Chrsiten-wees uit te kom?
- Die Hebreërs skrywer se voorstel van hierdie “klein stappe” is liefde, diens en geduld. Ek wonder of ons saam aan voorbeelde hiervan kan dink?
Kindertyd 10 Mei 2020
Hebreërs 4
Dink saam oor die volgende vrae:
1. Ek wonder of jy al so lank gewag het voor jy ʼn sjokolade of iets anders geëet het, dat jy later aan niks anders as daardie sjokolade kon dink nie?
2. Ek wonder of jou ma of pa al vir jou gevra het om iets te doen, maar dan doen jy dit nie dadelik nie en dan pla so stemmetjie in jou kop jou heeltyd daaroor?
3. Hoe voel dit wanneer iemand jou gevra het om iets te doen en jy kon dit dadelik op jou eie regkry?
4. Ek wonder of daar dinge is wat Jesus van ons vra wat ons nog nie reggekry het nie, wat ons so bietjie pla omdat ons dit nie doen nie?
5. Dink aan verlede week se “huisreëls”. Watter van die reëls het jy reggekry om te doen en watter sukkel jy nog mee? Hoe laat dit jou voel dat jy nog so bietjie daarmee sukkel?
Doen nou die volgende altiwiteit:
Help die seuntjie en dogtertjie om hul “werkie” klaar te maak en die sjokolade op te eet sodat hulle bietjie rus kan kry.
(Daar is verskillende moeilikheidsgrade vir verskillende ouderdomme)
Ons laai elke week ʼn video en ʼn aktiwiteit op.
Vandag se aktiwiteit
1. Gesels saam oor julle huis se huisreëls.
2. Indien julle nog nie het nie, stel saam huisrëels op of
gesels oor die voorbeeld hieronder.
3. Skryf en versier julle eie huisreëls of versier die reëls
hieronder.
4. Praat weer oor hoekom die reëls belangrik is.
5. Praat veral oor wat onvoorwaardelike liefde beteken al
kom iemand nie die reëls na nie.
6. Gesels oor hoekom daar sekere riglyne in die Bybel is
oor hoe ons moet leef al het Jesus klaar aan die kruis
gesterf en hoef ons niks meer te doen om gered te
word nie.
Saam met ons weeklikse preke gaan ons ook van hierdie week af vir julle ʼn kindertyd beskikbaar maak wat by die tema van die preek pas. Elke week sal daar ʼn video en ʼn aktiwiteit beskikbaar wees.
Ons voorstel is, om soos met “gewone eredienste” die volgorde soos volg te doen:
- Kyk watter aktiwiteite vir die kindertyd voorgestel word en kry dit gereed (miskien moet iets uitgedruk word of die potlode nader getrek word.)
- Indien daar aanbiddingsvoorstelle op die ‘huiskerk’ bladsy is, sing 1 of 2 liedjies saam
- Kyk saam die kindertyd video en gesels daaroor.
- Gee vir die jonges hulle aktiwiteite om te doen
- Kyk die preek terwyl die kinders hulle aktiwiteite in julle teenwoordigheid doen.
Pretweek
In die Junie, Oktober en Desember skoolvakansie het ons drie-dag Pretweke. Die fokus hiervan is om, gekoppel aan ’n tema, saam te leer te speel, te sing en sommer ook lekker te eet. Die Junie en Desember vakansies is vir al die junior jeug en die Oktober vakansie se fokus is spesifiek op Gr. 4-6. Wees ook op die uitkyk vir advertensies hieroor.