16 Dae Aktivisme van Geen Geweld teen Vroue en Kinders
Die 16 dae van geen geweld teen vroue en kinders vind plaas vanaf 25 Nov to 10 Des. Ons as kerk en gemeente ondersteun hierdie veldtog deur die volgende verbintenis aan te neem. Dit sal deel vorm van ons eredienste sodat ons almal kan insluit. In 15 September se afkondigings het ons verwys na die geweld van die afgelope tyd waar ons opnuut bewus geraak het van die misdaad- en geweldprobleem waarin ons land gedompel is. Ons as gemeente rou saam met die kerk in geheel en wil deur hierdie verbintenis ons ondersteuning toon. Die gedrukte verbintenis gaan vanaf volgende Sondag beskikbaar wees vir die wat dit wil onderneem.
Die verbintenis
Ek onderneem die volgende, en mag die Heilige Gees my hiermee help:
Ek glo dat elke persoon geskep is na die beeld van God en dat God my verantwoordelik hou hoe ek hulle, en myself, behandel.
Vandag maak ek ‘n belofte dat ek myself aanspreeklik sal hou teenoor my naaste vir God se plan met ons.
Ek beloof om my naaste met eer en waardigheid te respekteer.
Ek beloof om my naaste te dien en vir hulle lief te wees soos ek myself lief het. Ek beloof om hul almal met vriendelikheid en sagtheid te behandel, veral die wie kleiner en meer kwesbaar is.
Ek beloof om my te weerhou van enige moontlike kras houding en woorde wat ander mense intimideer en oneer aandoen.
Ek verstaan en bevestig dat respek wedersyds is, en dat ek geen spesiale reg het op grond van my geslag of posisie nie.
Ek beloof voor God in gehoorsaamheid aan Sy Woord, dat ek die nodige respek aan elkeen sal wys en hul welstand sal help bevorder deur wat ek doen, dink en sê.
Bogenoemde geld allereers in my gesin en familie, maar ook teenoor vriende, kollegas en elke naaste wat my pad kruis.
Thursdays in Black
Geslagsgebaseerde geweld is ‘n universele en wêreldwye saak wat mans, vroue en kinders op hul privaatste gebied benadeel. Ons voel dikwels hulpeloos en hopeloos te midde van soveel pyn en onreg.
Ons kan egter almal betrokke wees by ‘n eenvoudige maar kragtige veldtog om geslagsgeweld aan te spreek. Mense oor die hele wêreld dra elke Donderdag swart as ‘n simbool van krag en moed, wat ons solidariteit met slagoffers en oorlewendes van geweld verteenwoordig, en ‘n wêreld sonder verkragting en geweld oproep.
Hierdie knoop is te koop teen R10 elk na aflê van die belofte. Dit sal na die eredienste beskikbaar wees in die kerksaal.
Lees gerus meer oor Thursdays in Black op hul webwerf.
Verwante artikels
Gebrokenheid en Geweld: Dit raak ons almal (ds Elmarie Dercksen se artikel soos gepubliseer deur Maroela Media)
Geweld teen Vroue en Kinders (Algemene Sinode se Gender Taakspan se artikel)
16 Days of Activism (SA Government Article)
Badisa launches flash mob for 16 Days (YouTube video)